人-為何要長大﹖

唔知點解﹐喺呢個年代﹐好似所有人﹐所有事﹐都有特定要發生嘅次序﹐如果唔跟住做﹐就好似怪人一樣﹐不容易被人接受。自問都係一個幾受人影響嘅人﹐好注重自己喺其他人心目中嘅印象﹐所以有時都覺得無咗自我咁。不過而家開始﹐慢慢學緊去多聽自己嘅意願﹐多D去俾自己稔想點﹐離我可以咩都唔理咁去表達自己想法仲有一段距離﹐不過我估都係一個好嘅開始嚟嘅。

講番話大個﹐其實問題不止是問為什麼我們「要」長大﹐亦問為著什麼我們「會」長大呢﹖

前幾日同兩個朋友傾計﹐我哋講到要儲蓄買樓﹐又講到要小朋友﹐唔可以等太耐之類嘅嘢。

其實聽完個friend咁講﹐我意外地唔係覺得太感慨。雖然話好似大個咗多咗好多考慮嘅因素﹐但係自主權亦多咗。人大咗﹐並唔係好多嘢唔做得﹐而係發現原來有好多嘢我哋係唔識做﹐唔夠膽做﹐同埋懶得去做。細個不知天高地厚﹐梗係覺得自己叻喇﹐有勇有謀。大個咗就知並唔係咁。

一個人長大﹐係無可避免嘅過程(都幾切合我呢個blog)﹐無喺屋企住﹐為我帶嚟兩種啟示。第一﹕有屋企人真係好好﹐佢哋永遠明白我﹐遷就我﹐為我著想。喺屋企何止係一個皇帝女呢﹖亦因為咁﹐就為我帶來第二個啟示﹐就係喺屋企實在太好﹐好到令我變得依賴﹐變得無主見﹐變得迷失自己。而家多咗嘢要自己決定﹐自己面對﹐我覺得好似重新認識自己。

大個咗的確係多咗嘢稔﹐但係正如我其中一個生活理念﹐就係我哋成日都有選擇權﹐無得揀呢句並不正確﹐只係我哋覺得另一個選擇「唔抵」。有人會問﹐點解咁難﹖又點解係我呢﹖其實我覺得﹐無論係幾多歲﹐生活有幾多挑戰﹐我哋都可以有選擇權 - 可以還擇開心咁面對。我係好鍾意自己像永完長不大﹐但係即使要大個時候﹐我都好享受。唔通因為怕要長大而唔去享受生命中每一個時段可以經歷到嘅事咩﹖每個時期我哋都會覺得好難﹐但係唔經歷困難﹐我哋只會原地踏步。

我對於現在嘅生活好滿足﹐祝願每一個人能喺成長路上找到令自己快樂嘅點滴。

感謝陪我一起成長的你。