學識行喇

十月七日﹐星期三﹐大風

小BuB 識行喇﹗

其實都係十日前嘅事。九月廿六號幫Ami同Aaron做完花女之後﹐第二日小BuB就開始夠膽自己行。佢真係行得好得意。而家越行越快﹐真係要好小心睇住唔俾佢入廚房。

小BuB得意事件簿

九月十四日

琴日Ami 同Aaron開helpers meeting。我哋都有帶埋小BuB去。佢好得意。咁我哋開頭介紹唔同helpers嘅時候都會拍手﹐不過拍咗幾個之後就停咗﹐點知小BuB就開始喺每次Ami或Aaron講完嘢之後就拍手掌仔﹐搞到大家又要跟住佢一齊拍﹔最正就係佢唔止一次咁做﹐好似真係識聽咁。另外又唔知講乜嘢﹐總知係幾好笑﹐個個都笑﹐當笑聲稍為緩和之際﹐小BuB就會開始大笑﹐真係引到全場都好開心。

晏晝餵Doh B食嘢﹐一如平常都係要俾唔同嘅玩具小BuB玩﹐不過琴日我俾其中一件佢嘅時候﹐佢竟然擰頭﹐笑到我同BuBu死。同埋呢幾日教佢食飽嘅時候拍下個肚等我哋知佢飽﹐咁琴晚食食下佢又俾Mr. Chow 呼喚﹐咁我就問佢係埋飽飽唔食喇﹖當時佢已經吞得好慢﹐稔住佢都會話夠﹐點知佢又無﹐咁埋繼續氹佢食﹐點知食多兩啖﹐我行開咗(因為實在吞得太慢)﹐佢得然拍咗兩下手然後就拍拍個肚仔﹐(according to BuBu)。又一好笑嘢。

雖然小BuB仲未識講嘢﹐但係我相信﹐除咗有時係咁巧合佢俾咗適當嘅反應之外﹐我認為其實小BuB真係聽得明好多嘢﹐所以我要成日提醒自己﹐要做一個好榜樣﹐因為佢絕對係一舊有超凡吸水力嘅海棉﹗

Labour Day Long Weekend

九月八日 星期一 晴

返咗工差不多一個月﹐而BuBu亦喺上星期三last day 咗。要keep up 寫blog真係好難﹐因為返咗工﹐放工後煮下飯﹐洗下衫﹐執下嘢﹐餵小BuB食下嘢﹐同佢訓﹐已經係十點鐘 。沖埋個涼已經夠鐘訓覺。有小朋友嘅日子真係過得好快。

Ami嘅婚禮仲有唔夠三個星期﹐之前我哋講過話如果小BuB到佢結婚時可以只係拖住一隻手行﹐就可以請佢做花女。點知講完唔夠一個星期﹐小BuB就真係開始可以拖住一隻手行。不過小BuB淨係肯行佢想行嘅方向﹐到時再睇下點喇。

前兩日小BuB開始試下自己企﹐如果佢雙手有嘢玩時候佢可以自己企到少少﹔又試過行兩步過黎我度﹐原來可以睇到佢嘅第一次係咁興奮嘅﹐果然有小朋友嘅開心係同其他嘢好唔同﹐無得比﹗

今個長週末都幾忙。我哋首先喺星期五晚搞咗BBQ﹐請番幫過我哋整patio嘅朋友食番餐。天氣幾好﹐不過太遲開始﹐燒燒下天都黑晒。Bev病咗所以只有Bennett同Easta。估唔到食得晒所有嘢(腸仔﹐牛仔骨﹐豬扒﹐雞翼﹐磨菰﹐魚蛋﹐墨魚丸﹐同埋好多西瓜)。

星期六朝早去咗Superstore shopping﹐因為係”no tax day”。到有d收穫﹐買咗baby cereal, 小BuB嘅傷風藥﹐同埋買咗d BBQ supplies﹐一個舊嘅BBQ 經過BuBu嘅巧手修理後又up and running。下晝就去咗Ami嘅bridal shower﹐去咗brisque painting。我呢d咁無藝術細胞嘅人就揀咗用鮮豔嘅顏色嚟做賣點﹐哈哈。之後去媽咪度接返小BuB去食飯﹐好彩佢食得飽又訓咗晏覺﹐所以表現都好合作。

星期日choir BBQ﹐喺Phyllis Rawlinson Park。BBQ好似馬拉松式咁﹐我哋一點幾去到﹐五點幾走嘅時候仲有好多人﹐真係食足全日﹐哈哈。天氣好到不得了。凍同落雨落足差不多成個暑假﹐終於臨尾有perfect weather﹗

星期一﹐勞工日﹐我哋去咗Buffalo購物。去程小BuB差不多訓足全程﹐差不多去到先醒。跟住我哋去行咗Boulevard Mall﹐喺Children’s Place買咗d衫仔俾佢﹐佢都行咗少少mall㗎。跟住去 Babies R Us就留得最耐﹐好多衫仔都好得意﹗﹐買嘢俾小BuB我真係好捨得(well, 比起要我買件衫﹐我都不知要稔幾耐﹐但係琴日一氣過買咗六套﹐plus d 單衫同底衫。)。不過由於Doh B小姐無訓晏覺﹐所以跟住去 Target只係行得一陣佢就失控﹐要走。End up我都無時間買/睇自己嘅嘢﹐不過都好開心﹐因為有好多收穫﹐哈哈﹗回程時小BuB訓咗大半個鐘﹐醒時心情好差﹐係咁喊﹐我要坐去後座陪佢﹐跟住佢又想出黎﹐咁我唯有扮抱佢﹐攬實佢咁佢就收聲﹐不過我嘅position好怪﹐搞到腳痹﹐而佢就發晒呆咁﹐仲以為佢會訓番﹐點知佢過咗差不多半個鐘突然醒晒﹐哈哈。估佢可能肚餓﹐所以就做好高難度嘅動作—就係喺車度餵佢食cereal。好鬼 messy﹐ 不過總算餵咗佢食d嘢喇。

好充實嘅weekend 呢﹗

Happy 3rd Anniversary and Happy 1st Birthday

Time flies and today we are celebrating our third wedding anniversary and Tulia's first birthday. Today of last year I have just been administed the epidural to relief my on-going 12 hour pain. In about 10 hours, Tulia will have arrived on earth for 1 full year! Looking back at this past year, Tulia has really really grown a lot, physically and developmentally. Considering she knew nothing when she came, she's really a sponge in absorbing, practising and mastering different skills.

It has always been to my amazement that I am now a mother. I just hope that with practice, I become a better mother and be able to better juggle my time to be a good wife, daughter, friend, employee as well.

Although I keep saying that I'd rather not share our anniversary with Tulia's birthday being on the same day, I know it is in God's plan to have her arrive on this particular day, to remind BuBu & I how she is the ultimate gift from God, and the fruit of the love we share as a couple as this is the very day when we made the promise to God to love and treasure each other. She is God's messenger to remind us, year after year.

領洗

今日小BuB領洗喇﹗原本一月就問﹐不過四月爸爸返咗香港﹐六月原本到OK不過橫豎都改期就改到今日契媽喺度同我哋一齊分享咁開心嘅日子。而家小BuB仲訓緊覺﹐希望佢儲足精神黎參與佢嘅大日子喇。

八月八日星期六

距離開工嘅日子只係淨番兩日﹐原來要keep up 寫blog真係一件好困難嘅事﹐好似已經miss咗好多小BuB嘅點滴。估唔到一年嘅產假就係小BuB一秒一秒長大中溜走﹐有時覺得生佢好似係好耐以前嘅事﹐但係稔下陪佢成長﹐又覺得時間過得好快。

小BuB里程碑

第二至第三個月﹕發現手手﹐望住發呆﹐然後發然另一隻手﹐再發然原來兩隻手可以交叉
第三個月﹕發現自己可以大叫﹐開始要喺睡夢中食奶
第十八週﹕終於知道原來水溫要凍d先鐘意沖涼
第十九週﹕Foo被, 轉身向左邊
第二十週﹕轉身向右邊
第廿一週﹕Boo口水
第廿二週﹕較剪腳
第廿三週﹕用腳夾到公仔出聲﹐將圈圈由右手交換到手
第廿五週﹕轉身180度﹐不過有一隻手仲係唔識伸番出黎﹐同埋未識還原
第廿六週﹕豬鼻豬嘴豬聲出場。唔知佢喺邊度學番黎﹐好醜樣(不過好得意﹐但係唔可以俾佢見到我哋笑﹐唔係佢有排重覆)﹔換片時會扭腰扭bum﹐又一個得意樣﹔出牙仔

第廿八週﹕勁踢腳令到個swing自己move

第三十週﹕好輕易咁轉到身

第卅二週﹕嘗試爬﹐不過愈想向前﹐就愈後

第卅四週﹕唔再點爬﹐改用個bum﹐坐喺度屹

第卅五週﹕識拍手嘅動作﹐同伸手要抱抱

第卅六週﹕由趴喺度用雙手push到坐起身

第卅七週﹕拍手會出聲﹐同識用拍手to ask for favors

第卅九週﹕開始學企

第四十七週﹕開始學行﹐當然要「的」住喇﹐不過自己識提腳

第四十八週﹕終於有啲類似媽媽嘅聲音出現
第五十一週﹕玩到忘形時自己企咗兩秒。另外又開始扶住嘢行

Sleep Training Day 1

Sleep Training Day 1 (七月三日)

Nap - 按緊雙腳﹐唔俾轉身﹐喊咗半個鐘先訓得著

半夜喊醒 - 我採取唔抱抱嘅方法﹐小BuB就不停企喺張床仔度﹐我又放番低佢﹐期間又出房。小BuB喺凌晨三點喊咗足足一個鐘﹐最後終於倦到要訓。

我因為唔夠訓就勁爆暗瘡﹐希望快d可以train到小BuB唔駛食住奶訓﹐同埋半夜唔好醒咁多(至少唔駛我起身氹番佢訓)。

玫瑰疹 (Roseola)

唔知小朋友係咪特別鍾意夜晚同weekend病﹐因為無醫生睇嘛﹗小BuB(星期四)退晒燒﹐一切都好似正常番(除咗唔想食嘢﹐which, to 小BuB,都算係正常不過嘅事)之際﹐星期五下晝開始﹐大脾著住片嘅位置紅得好緊要﹐仲以為因為出汗所致。但係踏入黃昏﹐塊面就開始一笪笪﹐而且唔係permenant,一時喺對眼度﹐一時喺面﹐一時雙耳﹐我哋就開始估﹐唔知係咪敏感﹐食物﹖衣物﹖我食嘅嘢(因小BuB仲有飲d人奶)﹖花粉﹖食物衣服都應該唔係丫﹐因為都無用咩新嘢﹐不過都全部換過同洗下﹐食物就淨係下餬仔。到琴日﹐情況依然係無咩好轉﹐而紅嘅地方都係好㷫﹐好在小BuB就好似唔係好痕咁(但係佢拗邊度﹐邊度就紅)﹐不過我哋見到佢就好似好辛苦咁囉﹐眼腫耳又腫。琴晚上網﹐BuBu 覺得徵狀似係Heat rash﹐咁我哋就幫小BuB除緊d衫﹐情況好咗d﹐不過都仲係紅﹐跟住call過Tele-Health問護士﹐佢話可能係Virus﹐咁亦都吻合星期二去睇醫生時﹐由於無其他病徵﹐醫生話可能係病毒感染嘅開始。夜晚我再上網睇﹐覺得似係

玫瑰疹(Roseola)﹐呢隻病簡介如下。

BB發燒，已經教父母擔心不已，如果當稍稍退燒時，卻發現BB身上出現紅疹，絕對會嚇怕一些沒有照顧孩子經驗的父母。事實上，這時候BB可能是感染「玫瑰疹」，這是幼嬰兒很常見的斑疹病症，通常在春秋兩季較為多見，一般而言不會引起嚴重併發症，大約一星期便會痊癒。

疾病名稱：玫瑰疹(Roseola Infantum）

病發原因 通常是由過濾性病毒引起的，這些如第六及第七型人類疱疹病毒，主要會感染六個月至三歲的小孩。這病是會透過唾液及飛沫傳染的，所以也屬傳染病的一種。 病癥 形狀方面有些似熱痱。BB在感染玫瑰疹初期，通常會持續發燒兩至三天，體溫有時甚至達40度的高燒水平，但一般而言高燒都會慢慢消退。大部分BB在病發期間，除發燒外，其餘的表現如胃口都是正常。但有部分則會出現呼吸道感染的病癥如咳嗽、食慾下降、脾氣暴躁、流鼻水及輕微腹瀉等腸胃症狀。而玫瑰疹最大的特色，就是當孩子的高熱退減之時，身上的紅疹便會出現。出疹位置會首先在臉部、頸部及胸口，然後逐漸擴散到背部及手腳。通常這些疹不會為BB帶來任何痕癢或痛楚，而紅疹更會在兩三天後消退，並沒有留下有任何疤痕。 診治情況 當發現BB發燒及出紅疹，應立即找醫生求診，因為發燒及出疹也是其他嚴重疾病的病癥。當確認是玫瑰疹後，通常醫生會處方一些退燒藥物。這時候，父母千萬不要為BB的紅疹塗上任何藥膏，這可會令他們更容易患上皮膚炎。 病情護理 由於玫瑰疹是屬傳染性的，所以患病的孩子在紅疹未消退前，也應避免到公共場所和上學，以免將病毒傳染給其他小朋友，最好留在家中多休息飲水。而玫瑰疹一般只會發生在嬰兒身上，所以隨著年齡增長，患上玫瑰疹的機會也相對減少。由於這病毒並沒有任何的預防疫苗，所以父母應注意家居環境的衛生，培養幼兒的均衡營養飲食習慣，及保持擁有健康的體質，那便自然有足夠的抵抗力預防這疾病。

希望小BuB快d好番喇。稔住聽日去睇醫生﹐唔知d疹會唔會真係發兩日﹐今晚不醫而癒呢﹖

另外琴日出去食晏﹐BuBu抱小BuB落車時﹐小BuB突然叫咗一聲「爸爸」﹐同平時一輪咀嘅bu bu ba ba 聲不同﹐我相信佢唔知自己講乜嘢嘅﹐不過我同Doh爸一樣咁開心﹗

今日母親節﹐但我並未覺得有咩特別﹐或者仲未覺得自己咁係一個媽咪﹖不過都祝願天下母親﹐媽咪節快樂﹗

入醫院

前日朝早七點小BuB叫﹐幫佢換片時發覺佢個身好㷫﹐一探熱發現原來係發燒﹐38.9度。全日小BuB都係無精力﹐又扭計。食咗藥(actually 係塞咗bum bum)幾個鐘後d燒又返嚟。到前晚十一點﹐覺得佢又好㷫﹐再探熱原來已經燒到39.8度﹐即103.6F﹐真係好嚴重﹐由於小BuB仲咁細個﹐怕燒壞腦﹐所以即使稔住要喺醫院好耐﹐都決定叫救護車送小BuB去醫院檢查下。救護車都好快出現。去到醫院﹐當然係等、等、等。過咗三個鐘﹐終於有護士第一次為小BuB check vital signs﹐當時小BuB心跳高達每分鐘17x下呢﹗跟住當然又等。期間見小BuB有d肚仔餓﹐妄想餵佢食奶﹐搞咗大半個鐘都係唔肯食(should be an expected outcome considering eating at home was difficult enough)﹐又出番waiting room守候。過多一陣終於見醫生。稔住小BuB退咗d燒﹐應該都無乜嘢﹐好快可以走。點知﹐醫生問有無其他病徵﹐如傷風咳﹐疴嘔等徵狀﹐但佢又乜都無。跟住醫生話驚佢係尿道炎﹐因為年紀輕﹐尿道炎有可能導致膀胱永久性嘅損害﹐所以要插尿管攞小便去驗﹐聽到後我哋有種晴天霹靂嘅感覺﹐不過醫生講得咁嚴重﹐咁我哋都同意要做。我有問過醫生有無麻醉藥可以用﹐但係佢話小BuB年紀太細﹐用藥有危險﹐再者過程應該都好快。點知一個﹐兩個護士﹐用到最細條管都插唔到入去﹐小BuB當時已經好眼訓﹐又係咁俾人篤﹐不停咁喊﹐Doh爸同我捉住佢對手﹐一度唱住歌仔﹐希望盡量減輕佢嘅痛楚﹐真係心都實埋。最後兩位護士都係攪唔掂﹐叫咗第三個護士入黎幫手﹐點知都係插唔到﹗我真係想問到底仲要小BuB受多幾多次至得﹖﹗正當護士們綢帳緊點算﹐小BuB終於pee pee﹐咁就可以免卻繼續被篤嘅慘痛。一著好衫﹐抱起小BuB就訓著。又等了兩個幾鐘﹐好在小便結果係 negative﹐燒又退咗﹐終於喺大概七點可以返屋企。返黎訓完五個鐘﹐食少少嘢﹐又再訓四個鐘。之後就開始正常番﹐會玩會叫。雖然小 BuB越黎越high maintenance﹐但係點都情願佢要我哋陪佢玩﹐好過佢連玩都無興趣。唔通真係如契媽所講﹐係一個24小時嘅Virus襲擊小BuB﹖只希望佢快快康復﹐做爸爸媽媽嘅我哋就開心。

七個月﹐又打針

話咁快又一個月。聽日小BuB就要去補打番六個月嗰兩枝混合針﹐希望佢唔會好似四個月時發咗兩日燒喇。

BB病了

小BuB六個月大嘅日子﹐竟然係以傷風﹐咳同發燒黎慶祝。

星期四嗰日只係有幾聲咳同埋有d痰﹐見星期五都未好番咁就去咗睇醫生﹐點知返黎之後病情開始走下坡﹐開始流鼻水﹐到琴日仲開始發燒。原先以為只係少少嘅菌﹐搞到小BuB好辛苦﹗佢又唔識鼻涕﹐又唔識咳d痰出黎﹐因為透唔到氣﹐食唔到奶﹐訓著咗又成日會醒。真係睇見佢咁辛苦﹐好心痛呢﹗最難過係幫唔到佢令佢舒服d。希望快d好番﹐做番平時活潑好動嘅小BuB。

照顧一個病咗嘅BB﹐不停咁喊﹐真係好好嘅耐性訓練﹐亦讓我哋感受到細個時病咗係幾咁要父母擔心。

情人節

有小BuB同我哋過嘅第一個情人節﹐估唔到我哋可以出去食餐飯。為咗避開人潮﹐星期五晚(二月十三)我哋去咗食日本任食慶祝﹐雖然我仲未可以食魚生﹐但係可以同BuBu&小BuB一齊食到一餐兩個鐘嘅飯﹐好開心。星期六BuBu買咗我鐘意嘅Calla Lily番黎。雖然情人節買花一向都唔抵﹐但係收到BuBu嘅幾枝花係好開心呢﹗呢份心意希望繼續有來:) 之後我哋去咗行Vaughan Mills, BuBu買咗隻Winnie the Pooh公仔俾我。事緣係之前傾計﹐我話其實細個同埋以前拍拖時都好想收到公仔做禮物﹐而Winnie the Pooh 係我好鍾意嘅公仔呢﹗BuBu嘅心思﹐很窩心呢﹗琴晚就煮咗Pasta繼續慶祝﹐嘻嘻﹗

喺呢個情人節﹐我亦發然小BuB有兩隻小門牙嘅縱影﹐我估禮拜頭絕食事件可能同牙仔要出黎有關﹖總之情況好咗就算喇﹗繼之前因為小BuB唔開心﹐呢幾日我就多咗留意小BuB嘅得意嘢﹐琴晚訓覺嘅時候都稔﹐其實都唔駛太緊張﹐小BuB真係一個好開心嘅BB﹐見到咩人佢都好好笑容﹐一路以來我想小BuB有嘅﹐正係開心嘅性格﹐雖然唔知佢笑係咪真係好開心﹐不過掛上一塊笑臉﹐我就當佢係㗎喇。小BuB真係一個Sweetheart.

絕食篇

近乎絕食嘅小BuB﹐再一次向我嘅底線進發﹗繼上次(大概4個星期前)要氹好耐先食﹐而家小姐依然要訓先肯食﹐但係就食唔夠幾分鐘就訓著﹐好似唔駛食咁。我估亦因為咁﹐佢精神嘅時間縮短咗﹐亦都越來越眼訓。因為覺得個cycle會越來越差﹐所以今日帶咗小BuB去睇醫生﹐亦一如所料﹐醫生都係話佢都唔似有咩事﹐可能係出牙仔。不過醫生都話佢呢款要訓住黎食就唔係咁好。

亦因為小BuB又再發作﹐擔心到時去到第二度我哋都無得玩﹐所以我哋原先計劃嘅西岸之旅(溫哥華及卡加利)﹐同埋去參加革嘅婚禮都要暫時擱置。不過亦因為今次﹐BuBu同我都覺得﹐要去一個令大家都開心嘅旅行﹐除咗話要計劃得周詳之外﹐就係我哋要開似出去多D﹐同埋要調校一下出去之前同之後嘅心情。過去呢幾個月﹐因為小BuB好難先餵得到﹐所以如果時間唔係咁岩﹐我哋最後都會取消想去嘅地方而留喺屋企等佢食。其實咩生活模式(出街與否)唔係最重要﹐最緊要係BuBu同我可以喺當中找到快樂。呢段日子我哋放棄咗呢D出街嘅機會﹐有時都會覺得唔抵﹐因為最後小BuB都係唔肯食。Anyways, enough of looking back.

小BuB將近六個月大喇﹗喺未生佢嘅時候以為自己可以做到唔太緊張﹐但原來到親身經歷就唔係話想點就點﹐不自覺就會緊張起來。不過過咗幾個月﹐我嘅體會係好多嘢唔到我控制﹐順其自然似乎係我當前要快D學識嘅態度。希望不久嘅將來我可以自豪地同大家講我做得到。

正如我成日同BuBu講﹐我哋應該多揀開心嘅嘢黎記﹐困難及唔開心嘅﹐過咗就算﹐唔應該成日攞番出黎回顧。睇住小BuB D相一張一張咁過(Slideshow)﹐其實佢都有好多好多得意嘢值得我一次又一次會心微笑。都係o個句﹐只要小BuB開心同健康﹐其他嘢輕鬆過去就ok喇﹗

Glad that at the end of this post, 不歡一掃而空 =)

幸福的感覺

剛睇完兩集由港台製作嘅「幸福的感覺」﹐裡面講嘅係一個小故事﹐一間魚蛋粉店因老闆中風﹐無法再親自打造魚蛋﹐又無人接手而準備結業﹐外孫女覺得很可惜﹐想延續外公的心血而辭工幫手﹐期間又巧遇上自小無乜主見嘅日本男仔﹐兩個為咗學做好魚蛋粉不斷嘗試﹐甚至返日本﹐向已鬧翻的烏冬麵店老闆的爸爸討教湯底的秘抉。日籍爸爸要孩子去不同地方試不同嘅用料同佢哋嘅特性﹐其實用意係要令佢哋知道﹐其實湯底並無秘密﹐大家覺得好食﹐係因為廚子用心去做﹐材料亦蘊含咗「故鄉」嘅味道。

睇完呢齣「幸福的感覺」﹐都叫我感受下自己呢一份感覺。其實我都好幸福﹐因為身邊嘅人個個都好愛惜我。

老公-先要多謝老公。自從有咗小BuB之後﹐有好多嘢佢都幫我做。而家小BuB出咗世﹐餵奶帶俾我嘅種種壓力﹐其實亦帶俾老公好多壓力。一來餵奶佢幫唔到我﹐真係想幫都唔知可以點幫﹐又要handle我因為小BuB所帶來嘅情緒起伏。記得生小BuB之前﹐我唔止一次要老公應承我﹐即使小BuB出咗世﹐都要最錫我﹐佢有應承我㗎﹗我知道每次小BuB激親我﹐BuBu都會為我嘅不悅而心痛﹐我知我有一個好錫我又緊張我嘅愛人。

媽咪-作為我嘅媽咪﹐小BuB嘅婆婆﹐可以做嘅媽咪都做晒。自從BuBu放完3個星期Parental Leave之後﹐媽咪都唔知嚟咗幾多日﹐陪我﹐教我同幫我湊小BuB﹐最pleasant嘅意外就係佢無俾好多意見﹐恰到好處﹔更有幾次俾我同BuBu出去享受小小二人世界嘅時間。我知佢無私嘅奉獻﹐全因為佢對我嘅愛﹐第時我返工佢更肯幫我湊小BuB﹐令我哋唔駛擔心要擺低小BuB喺咩日托中心﹐自己人點都安心好多。

妹-雖然佢拍拖無耐﹐但都未有忘記我呢個家姐。知道我心情唔好﹐總記得氹我幾句﹐買d嘢俾我食或者係探下我。知都有人記得自己﹐就係一份幸福嘅感覺。

小BuB-又點少得激到我唔知點算嘅女兒﹖因為佢咁細個﹐我都無稔住可以同佢講咩道理﹐希望對佢笑多d﹐俾佢感受到開心幸福嘅感覺﹐佢長大後都可以做個開心快活人。其實喺一次辦告解時﹐張神父同我講﹐要喺BB身上觀察並學習。BB其實乜都唔識﹐佢咩都係靠父母﹐作為父母﹐我哋咩都希望俾最好嘅佢﹐更何況係天主呢﹖我究竟做唔做到事無大小都信靠天主呢﹖

自問真係無先天條件做個好媽媽(例如好耐性﹐鍾意小朋友等特質)﹐我唯有靠天主俾呢方面嘅能力我﹐等小BuB唔會有咩缺少﹐反正小BuB都係佢賜俾我㗎喇。

餵人奶

好多媽媽都話﹐餵人奶係最自然﹐最方便﹐又最健康。小BuB已經五個月大了﹐但係我覺得﹐餵人奶嘅日子越來越困難。

一開始我唔識得擺位﹐搞到佢無乜得食﹔之後食得到個位﹐又會因為食得太多或太快﹐好容易嘔﹔嗰陣時見佢有時嘔到個鼻都噴奶﹐好辛苦﹐心都痛埋由十一月尾開始﹐唔知點解小BuB就開始喺食奶時要講嘢﹐又會叫﹐驚佢有咩事﹐帶佢睇醫生﹐醫生話可能出牙仔﹐不過都總算會食﹐又有加磅﹐仲可以接受。十二月尾打四個月嘅兩支針﹐俾Infant Tynenol 佢食﹐食一次就嘔一次﹐無論係空肚定飽肚都好﹐又一次心痛。阿媽新年返咗香港之後﹐情況變得越來越差﹐先係我乳線炎﹐Milk Supply大大下降﹐到有返奶之後﹐佢就開始唔肯食。以前每幾個鐘都會食一次﹐而家﹖要趁佢眼瞓先可以餵﹐有時要整醒佢﹐可能肯食少少﹐有時太醒就唔肯食。一係就要玩到佢眼瞓﹐and even then﹐通常擺佢埋嚟﹐佢又要嗌一輪﹐我又要又要唱歌﹐都仲未必會食﹐每一次都好似迫佢食咁﹐大家都好辛苦。下個星期係五個月嘅檢查﹐到是真係要問下醫生﹐到底佢係咪有咩事﹐又或者可以教佢用咩杯飲嘢﹐因為奶樽佢又唔肯用﹐麥片又未識食﹐條脷成日頂番出嚟。人人都話﹐肚餓自然會食﹐但係我淨係見到﹐佢好多個鐘都可以唔駛食﹐我都唔知仲可以點。最弊就係即使我鬧﹐佢都唔會明。日復一日﹐我驚自己EQ唔知挨得幾耐。

乳線炎

上星期二晚突然發冷發熱﹐周身骨痛﹐星期三覺得自己似條喪屍咁﹐動彈不得﹐原來係乳線炎(Mastitis)﹐燒到102度。星期 四去咗睇醫生﹐醫生開咗消炎藥﹐而家好番好多﹐但係奶水供應(Milk Supply)就驟減﹐搞到小BuB無嘢食。星期六晚真係無奶﹐有一餐希望要佢食奶樽﹐但係佢又眼訓﹐又唔肯食﹐見住佢餓住自己又無嘢俾佢食﹐真係心痛。唔知第時點可以教到佢食奶樽﹐定係要條去直接用杯飲嘢呢﹖星期四BuBu請咗假等我可以休息﹐其實星期三時真係好想BuBu喺度﹐因為真係好辛苦﹐但係佢無請假﹐雖然有少少失望﹐但都係預咗﹐所以星期四佢請假﹐我真係好意外﹐亦好開心呢﹗皆因識咗佢咁多年﹐我成日話﹐我病親都喺平日﹐所以從來都無機會俾佢照顧﹐十一年多以後﹐終於佢都自動照顧我﹐所以雖然辛苦﹐卻很窩心。有咗BB之後﹐好想被肯定、被愛﹐好想佢氹自己﹐所以久不久就會唔開心﹐覺得佢成日都無乜表示。其實理性地睇﹐我知佢好關心同緊張我﹐佢都做咗好多屋企嘢﹐讓我可以專心照顧小BuB。或者係因為對住BB時間太長﹐希望有佢氹下我﹐作為對我所付出嘅肯定同獎勵。人真係得一想二﹐不過貪心都係嗰句﹐希望久不久有D驚喜﹐希望我哋兩個除咗講小BuB之外﹐還有情趣可言。