幸運•感動

二月五號弟弟終於轉到身，七號見佢玩玩具識左右手交換。

做咗媽媽之後，好容易會感動。

好慶幸有第二次機會做媽媽，因為今次再湊BB，從容得多。上次由於太緊張，又可能因為班朋友都未有BB，覺得孤寂，所以有啲唔開心。今次適應咗媽咪呢個身份，加上弟弟容易湊，呢次產假過得真係開心。睇住Rex一日一曰咁長大，時間實在過得太快喇！前兩日抱起Rex，有一下感動到想喊。從來都唔係極度鍾意小朋友嘅人，但係見到弟弟笑我就心都溶晒！

講咗Rexy咁耐，又點少得Tulia大家姐？經歷真係會令人長大，自從有咗細佬之後，靜靜大個咗好多。每晚臨瞓前去睇佢兩個小靈精，就只有感動同感恩嘅感覺。原來靜靜就快3歳半喇！佢嘅長大提醒我千祈唔好放過任何陪佢哋嘅機會，因為過咗嘅呢3年半我係冇得返轉頭喇！當年轉政府工真係一個good move.

而家我只希望上天繼續眷顧我，賜我能力好好教佢哋。