搬屋, 結婚, 感恩

2006年﹐對於我﹐係好多改變嘅一年。

今年﹐我搬離住咗十幾年嘅娘家﹐去到一個新區﹐一間新屋﹐同一個十年前我仲未識得﹐今日已經係我老公嘅人一齊生活。

今年﹐我宣誓結婚﹐承諾餘生﹐無論環境順逆﹐疾病健康﹐都會愛阿基 - 呢個承諾好大﹐可能呢一世都唔需要再作咁嚴重嘅一個決定。

記得結婚前﹐唔止一個朋友同我講﹐覺得我一的都唔緊張﹐好似婚禮綵排嗰晚﹐就有人話我好似喺度幫緊朋友綵排(因為今年有好多朋友結婚)咁﹔另外伴郎又話我係one-of-a-kind新娘﹐結婚前幾日竟然願意同他吃日本任食。自己真係好好彩﹐因為有屋企人同好多朋友幫我哋手﹐令我完全唔駛擔心結婚當日嘅任何細節﹐所以先可以做個輕鬆嘅新娘。我自己都幾意外﹐去到結婚前一晚先至訓得唔係咁好。

另一樣令我意外嘅﹐係個多月來嘅婚姻生活並唔係想像中咁難適應﹐或者因為我哋仲係好忙﹐所以仲未知婚姻生活係乜嘢一回事﹐定係因為大家好彩地找到一個大家都舒服嘅相處方法﹖又好幸運我哋有好多有經驗嘅朋友提點我哋。有人問婚後生活點﹐我覺得改變唔係咁大﹐並唔係咁難令人接受﹔in fact﹐我都幾享受。

今年參加咗好多個婚禮﹐慶幸自己有多次機會幫唔同嘅新人﹐亦好高興見到好多情侶﹐經歷過時日嘅洗禮﹐仍選擇步入教堂。每對 couple所share嘅愛﹐都令我好感動。但與此同時﹐琴晚我喺短短半小時內聽到兩對情侶分手嘅消息﹐之前亦有另一個朋友受到感情重創。原來﹐活咗四分一個世紀以後嘅我哋﹐係被感情牢牢咁牽動住﹐好似去到呢個階段﹐大家都作出某些重大嘅決定。好彩嘅就找到一個自己所愛﹐又願同自己走埋下半生嘅人﹔無咁好彩嘅就係發覺﹐原來投放咗嘅時間同感情﹐並不夠叫自己或對方作出犧牲﹐又或者係﹐發覺原來自己愛得不夠﹐不敢叫對方犧牲﹐因為覺得自己的愛不夠用來回報對方的犧牲。又有其他例子﹐既不是不愛﹐但係總不願作出終身相守嘅承諾-其實咪又係愛得不夠之故。

感謝主賜我一個我既愛﹐而又愛我的人﹐賜我一個真心對我而又願意和我溝通的愛人。盼望未來的日子﹐自己每天愛他多一些﹐疼他多一點﹔而他﹐每天都比前一天更快樂﹐更幸福。

愛﹐只有愛得太少﹐愛得不夠﹔並沒有不懂得去愛 的人﹐只有不願去愛的人。大家勇敢地面對自己的感覺﹐放膽地愛吧﹗