做媽媽

二零一零年二月八日﹐星期一﹐晴

真係好難先先會乖乖哋打下Blog﹐小BuB唔經唔覺就已經快歲半喇﹗BuBu同我都好感恩﹐因為小BuB真係為我哋帶來好多好多嘅歡樂。唔同嘅人都話有小朋友嘅快樂並唔可以用筆墨形容﹐而家身處其中就真係感覺到。小BuB只要出力咁叫聲爸爸或者媽媽﹐我哋都會打從心底笑出來。每晚臨訓前我都會過去睇下小BuB﹐ 每晚我都感謝主賜俾我哋一個心肝寶貝﹐令我哋嘅人生更精彩。

小BuB又剛病癒﹐唔知點解次次佢病完就特別想寫下佢﹐或者因為見佢病心痛卦﹖小BuB每日都喺度學緊新嘢﹐有時都唔知自己係咪教得佢太少嘢。我哋都無乜系統﹐或者真係唔可以咁懶要睇下書﹐睇下有咩建議先得。好彩BuBu同我都覺得﹐學術上嘅嘢﹐例如ABC其實唔係咁趕﹐反而人際關係﹐待人接物﹐禮貌﹐同情心等更為緊要。我哋未必能將小BuB培養成人中之龍﹐不過我哋希望培養佢有好嘅人格。說易行難﹐希望我哋做得到喇﹗

做咗媽媽一段日子﹐開始習慣自己有呢個身份﹐講唔上話明白自己媽媽多咗﹐卻體驗到媽咪嘅無私﹐因為對住小BuB﹐從來唔會稔付出同收穫﹐this just does not occur to the minds。我好好彩媽咪可以喺日間湊住小BuB﹐等我可以無後顧之憂返工。呢份工並唔係我心目中嘅理想工作﹐但係可以俾我準時放工﹐係小BuB仲咁細個嘅呢幾年確係好重要。當初要喺S&A同City中二擇其一其實真係好痛苦﹐一份係有前途又有挑戰嘅工作﹐但係亦要付出好多寶貴時間嘅工作﹐另一份則只要安守本份﹐超穩定但係而家做落真係覺得有d浪費時間﹐因為實在係有d無聊。我估做政府工﹐最好揾多d其他嘢做﹐唔係真係虛度光陰。以家開始做 Arbonne﹐同繼續讀書﹐我真係唔係一個可以懶懶閒咁過日子嘅人。點都好喇﹐而家做咗差不多半年﹐如果再要我揀﹐我都會做呢份工﹐因為對於我﹐可以同小BuB一齊成長﹐陪佢玩等等就係最緊要。天主總會為我選擇最設合我需要嘅嘢﹐唔知我哋屋企嘅將來﹐隨住BuBu畢業又會有咩改變呢﹖